मेघौली विमानस्थलमा जहाज अवतरण गर्ने मुख्य क्षेत्रमा भवन निर्माण गरिएको भन्दै भरतपुर विमानस्थलले भरतपुर महानगरकाे वडा नं. २७ पर्साढापमा बन्दै गरेको प्रज्ञा एकेडेमीको भवन निर्माणको काम रोकेको छ ।
नागरिक उड्डयन प्राधिकरणको अनुमतिबिना नै विमानस्थलबाट ७ सय मिटरनजिकै मापदण्ड र समन्वय नगरी ६ तले भवन बनाइएको भन्दै रोक लगाइएको भरतपुर विमानस्थलका निमित्त प्रमुख दीपक विकले जानकारी दिएका छन् । विकका अनुसार अहिले भवनकाे चार तला बनिसकेको छ ।
प्राधिकरणको प्राविधिक टाेलीले रिपोर्ट नदिइन्जेल भवनको काम रोकिएको उनले बताए । एकेडेमीको भवनको नक्सापासका बारेमा विमानस्थललाई महानगरले जानकारी पनि नगराएको विमानस्थल प्रमुख विककाे भनाइ छ ।
घाँसे रनवेबाट स्तरोन्नति गरी पिच गराउन नेपाल सरकारले स्वीकृति दिइसकेकाले विमानस्थलमा नियमित उडान हुने र उडान सुरू भएसँगै जोखिम बढ्ने भएकाले काम रोकिएको हो ।
