शिक्षा, स्वास्थ्य तथा सूचना प्रविधि समितिका सभापति अम्मरबहादुर थापाले पछिल्लो समय देशका प्राकृतिक र सांस्कृतिक सम्पदाका माध्यमबाट पर्यटन प्रवद्र्धनका लागि राष्ट्रिय समाचार समिति (रासस)ले प्रचारात्मक काम गरेको गरिरहेको बताएका छन ।
अठारौँ गणतन्त्र दिवसका अवसरमा राससले आयोजना गरेको ‘पर्वतीय पर्यटनः हाम्रो शान, हाम्रो पहिचान’ शीर्षकको तस्बिर प्रदर्शनीको अवलोकनपछि उनले नेपालका राष्ट्रिय गौरवका रुपमा रहेको हिमालसम्बन्धी तस्बिर प्रदर्शनी महत्वपूर्ण रहेको प्रतिक्रिया दिए ।
उनले भने,“पर्यटक भित्र्याउन आवश्यक प्रचारात्मक व्यवस्था गरिनुपर्छ, अहिले हामीले उनीहरुलाई जाहेजस्तो सेवा सधिवा उपलब्ध गर्न सकेका छैनौँ । पाहुँनालाई सेवा सुविधा राम्रो दिन सक्यौँ भने पर्यटककै देशको आर्थिक विकासमा टेवा पुग्न सक्छ ।”
देशको अर्थतन्त्रमा कसरी विकास हुन सक्छ भन्नेमा राजनीतिक दल र सरकारले गहन अध्ययन र मेहनत गर्न आवश्यक रहेको जनाउँदै सभापति थापाले भने “अरुसँग माग्ने ल्याउने र वितरण गर्ने प्रवित्तिले देशको विकास हुन सक्दैन । सबै चिज भएर पनि देशलाई राम्रोसँग विकास गरेको भए निकै समृद्ध भइसक्थ्यो ।”
त्यसअघि सभापति थापालाई प्रदर्शनीस्थलमा स्वागत गर्दै राससका कार्यकारी अध्यक्ष धर्मेन्द्र झाले गणतन्त्र दिवसका अवसरमा मद्दत पुग्ने विश्वास व्यक्त गरे ।
यही जेठ ११ गतेदेखि सुरु भएको प्रदर्शनीमा देशका हिमशृङ्खला, हिमाली जनजीवन, प्रमुख पर्यटकीय गन्तव्यसम्बन्धी ९६ वटा तस्बिर समेटिएका छन् ।
