विश्वको सर्वोच्च शिखर सगरमाथा क्षेत्रमा एक अत्यन्त दुर्लभ र चमत्कारिक उद्धारको घटना सार्वजनिक भएको छ। गत जेठ १५ गते (मे २९) सगरमाथाको क्याम्प–३ माथिबाट सम्पर्कविहीन भएका अनुभवी शेर्पा तथा पर्वतारोही दावा शेर्पा (हिलारी दावा), करिब एक सातापछि जीवित अवस्थामा फेला परेका छन्।
सगरमाथा प्रदूषण नियन्त्रण समिति (एसपीसीसी) को फोहोर व्यवस्थापन टोलीले बिहीबार बिहान क्र्याम्पोन पोइन्ट नजिक उनलाई जीवित अवस्थामा उद्धार गरेको जनाएको छ। उद्धार टोलीका अनुसार दावा अत्यन्त कमजोर अवस्थामा बिस्तारै घिस्रिँदै सगरमाथा आधार शिविरतर्फ आउने प्रयास गरिरहेका बेला भेटिएका थिए।
५२ वर्षीय दावा शेर्पा क्याम्प–३ माथिको अत्यन्त जोखिमपूर्ण क्षेत्रबाट हराएका थिए। उनी हराएपछि हवाई तथा स्थलगत खोजी अभियान सञ्चालन गरिए पनि बुधबारसम्म उनको कुनै अत्तोपत्तो लागेको थिएन। खोजीका क्रममा हेलिकोप्टरमार्फत गरिएको हवाई अनुगमनले समेत उनलाई फेला पार्न सकेको थिएन।
अत्यधिक चिसो, अक्सिजनको कमी र मानव जीवनका लागि अत्यन्त प्रतिकूल मानिने ‘डेथ जोन’ क्षेत्रमा करिब एक सातासम्म जीवित रहनु आफैंमा असाधारण घटना मानिएको छ। प्रारम्भिक जानकारीअनुसार उनले यस अवधिमा पर्याप्त खाना तथा पानीसमेत पाउन सकेका थिएनन्।
उद्धारपछि दावा शेर्पालाई तत्काल उपचारका लागि गोरकशेप लगिएको छ। उनको शरीरमा शीतदंश (फ्रस्टबाइट) को समस्या देखिएको तथा बोल्नसमेत कठिनाइ भइरहेको बताइएको छ। यद्यपि उनको स्वास्थ्य अवस्था स्थिर रहेको उद्धार टोलीले जनाएको छ।
पर्वतारोहण क्षेत्रका जानकारहरूले यो घटनालाई सगरमाथा क्षेत्रको हालसम्मकै दुर्लभ जीवित उद्धारमध्ये एकका रूपमा व्याख्या गरेका छन्। यस घटनाले एकातिर मानव इच्छाशक्ति, सहनशीलता र बाँच्ने अदम्य चाहनाको उदाहरण प्रस्तुत गरेको छ भने अर्कोतिर हिमालको कठोर र अप्रत्याशित स्वभावलाई पुनः स्मरण गराएको छ।
दावा शेर्पाको सफल उद्धारमा खटिएको सगरमाथा प्रदूषण नियन्त्रण समिति (एसपीसीसी) को टोलीको पर्वतारोहण समुदायले प्रशंसा गरेको छ। पर्वतारोहण तथा पर्यटन क्षेत्रका सरोकारवालाले दावा शेर्पाको शीघ्र स्वास्थ्यलाभको कामना गरेका छन्।
