सरकारले सात हजार मिटरमाथिको हिमाल नचढी सगरमाथा आरोहण गर्न नपाइने प्रावधान ल्याउने तयारी गरेको छ।
राष्ट्रियसभा बैठकमा सोमबार आफ्नो मन्त्रालयको विनियोजित बजेटमाथिको छलफलका क्रममा उठेका प्रश्नको जवाफ दिँदै संस्कृति, पर्यटन तथा नागरिक उड्डयनमन्त्री खड्कराज पौडेलले नयाँ बन्न लागेको पर्यटन ऐन तथा नियमावलीमा यस्तो प्रावधान राख्न लागिएको जानकारी दिए।
सगरमाथामा आरोहणको चाप निकै बढेको भन्दै उनले आरोहणको चाप बढाउँदै लैजाँदा सगरमाथा सुरक्षित रहँदैन भन्ने चिन्ता स्वभाविक रहेको बताए। हिमाललाई मात्र पर्यटनको मुख्य आधार बनाउनुभन्दा अन्य क्षेत्रमा पनि ध्यान दिनुपर्ने उनको भनाइ छ।
उनले एउटै मात्र क्षेत्रमा प्रवर्द्धन गर्दा पर्यटन दिगो हुन नसक्ने भएकाले पर्यटनका विभिन्न आयाममा प्रवेश गर्ने योजना ल्याइएको जानकारी दिए।
त्यस्तै मन्त्री पौडेलले लक्ष्यअनुसार पर्यटक भित्र्याउन गाह्रो भए पनि हालको अवस्थामा भारतीय पर्यटकको ठूलो चाप देखिएको बताए। पर्यटन प्रवर्द्धनका लागि सरकारी, निजी, गैर-सरकारी, दातृ निकाय र डायस्पोरासँग सहकार्य गरेर अघि बढ्ने उनको भनाइ छ।
