सिन्धुपाल्चोकको हेलम्बु गाउँपालिका-३ पाल्चोकस्थित प्रसिद्ध धार्मिकस्थल पाल्चोकी माई मन्दिरमा भक्तजनको आर्कषण बढ्दै गएको छ । पाल्चोक मन्दिरमा सिन्धुपाल्चोक, काभ्रेपलाञ्चोक, नुवाकोट, भक्तपुर, ललितपुर, काठमाडौंलगायत जिल्लाबाट भक्तजन पूजाअर्चना र पञ्चवली लिएर आउने गरेका छन् ।
कोही भाकल गर्न र कोही भाकल बुझाउन मन्दिर आउने गरेको पाल्चोकी माई मन्दिर संरक्षण समितिका अध्यक्ष दमैसिङ तामाङले जानकारी दिए ।
एकदशी, औंसी, रामनवमी, महाशिवरात्री, साउन महिनाभर, श्रीकृष्ण जन्माअष्टमी र दसैंको घटस्थापनादेखि अष्टमीसम्म पाल्चोक भगवतीको मन्दिरमा बली निषेध गरिएको छ । पछिल्लो समय पाल्चोकीमाई मन्दिर जानका लागि सडक सुविधा र मन्दिर आसपासको सुविधा सम्पन्न होटल बन्दै छ ।
सडक पूर्वाधार, होटल र आकर्षक अन्य संरचना बनेसँगै भक्तजनको सङ्ख्या झनै बढ्न थालेको बताउँछन् पुजारी पर्वल गिरी । यस मन्दिरमा प्रत्येक वर्ष रामनवमी दिन देवी भागवत पाठ गर्ने प्रचलन चल्दै आएको छ ।
जय बागेश्वरी मन्दिर समुद्र सतहदेखि एक हजार सात सय ५० मिटरको उचाइमा छ । विसं १९५३ मा मैतेसिंह तामाङले विभिन्न सामान दान दिएर बहादुर खड्कालाई हस्तान्तरण गरिएको किंवदन्ती रहेको छ ।
अर्को किंवदन्तीअनुसार पाँचौं शताब्दीभन्दा पहिले मानव बस्ती बस्नका लागि पाल्चोक भगवती मन्दिर भएको ठाउँनिर खोल्सातिरबाट जङ्गल फँडानी र खन्दै आउँदा रगत बगेर आएको र अर्कोपट्टीबाट खन्दा दूध आएको हुँदा स्थानीय गाउँले (किसान)ले यहाँ देवदेवी हुन सक्ने भनी अनुमान लगाइ अनर्थ भयो भनी सरकारमा जाहेर गरेपछि दुई शिला प्राप्त भएको स्थानीयको भनाइ छ ।
दाहिनेपट्टि सुतेको अवस्थामा जय (जागेश्वरी) र अर्कोतिर उठेको अवस्थाको बागे (बागेश्वरी) देवीको रूपमा रहेकाले जय बागेश्वरी नाम राखिएको हो । दूध निस्किएपट्टि शिवजी (सिद्धेश्वर महादेव) को मन्दिर छ भन्ने विश्वासमा दूध नै चढाउने प्रचलन छ ।
स्थानीय शिक्षक रामगोपाल श्रेष्ठका अनुसार त्यसपछि गिरी र ब्राह्मणले मन्दिरभित्र पसेर पूजाआजा गर्ने प्रचलन चलाइएको थियो । त्यसक्रममा जुद्धशमशेरकी श्रीमती बिरामी भएर जय बागेश्वरी (पाल्चोक) मन्दिर देखाउन ल्याइएको र पाल्चोकका स्थानीय तेम्बा झाँक्रीले निको पारेपछि यो मन्दिर चर्चित भएको स्थानीय बताउँछन् ।
पर्यटकीय केन्द्र पाल्चोक
पाल्चोक मन्दिरमा मास्टर प्लानअनुसार काम हुने गाउँपालिकाले जनाइएको छ । पार्किङ, आकर्षक मन्दिरको संरचनालगायत पर्यटकका लागि आकर्षक वातावरण सिर्जना गर्नका लागि गाउँपालिकाले नियमित काम भइरहेको जनाएको छ ।
अब प्रत्येक महिनामा आन्तरिक र बाह्य पर्यटक कतिको सङ्ख्यामा हेलम्बु पुग्छन् भन्ने तथ्याङ्क सङ्कलनको काम गाउँपालिकाले गर्ने त्यही अनुसारको काम अगाडि बढ्ने गाउँपालिका अध्यक्ष निमा ग्याल्जेन शेर्पाले बताए ।
चर्चित पर्यटकीय गन्तव्य ह्योल्मो भूमि हेलम्बुबाट रसुवाको प्रसिद्ध लामटाङ र गोसाइँकुण्ड क्षेत्र जोड्ने दुई पर्यटकीय पदमार्ग अन्तिम चरणमा पुगेका छन् ।
सुन्दरीजल, कुटुम्साङ-घोप्टेघ्याङ-मेलम्चीघ्याङ, तिम्बु-मेलम्चीघ्याङ, पाल्चोक–ककनी, निगाले–ककनी, शेर्माथाङ–पाल्चोक जय बागेश्वरी भगवती पदमार्गको हालै स्तरोन्नतिको काम सकिएको छ ।
सिन्धुपाल्चाेकमा पर्यटककाे चहलपहल
विसं २०७२ को भूकम्प, कोरोना महामारी तथा २०७८ असार र त्यसपछिको बाढीबाट प्रभावित हेलम्बु, मेलम्ची तथा पाँचपोखरीमा आन्तरिक पर्यटकको चहलपहल ह्वात्तै बढेको छ । पर्यटकको आवागमनसँगै यहाँका व्यवसायी तथा यस क्षेत्रका बासिन्दाले राहत महसुस गरेका छन् ।
मेलम्ची हुँदै पाल्चोक भगवती, इच्छेश्वर महादेव मन्दिर, हेलम्बुमा निर्माणाधीन ग्रेट ट्रेल घुम्न जानेहरूकाे संख्या ह्वात्तै बढेकाे हाे ।
पाल्चोक मन्दिरमा अन्य बारभन्दा शनिबार यहाँ विशेष भीड हुने गर्छ । पाल्चोक, इच्छेश्वर महादेव मन्दिर हेलम्बु इचोकका संयोजक एवं समाजसेवी नयनबहादुर पण्डितले हेलम्बु तथा मेलम्चीको पर्यटन पर्वद्धनका निमिक्त उनीहरुलाई भ्रमणको आग्रह गरिएको बताए ।
उनले एक धार्मिक संस्थाले अर्को संस्थालाई भ्रमणको लागि गरिएको आग्रह स्वीकार गरेकाेमा आभार प्रकट गरे । हेलम्बु गाउँपालिका अध्यक्ष शेर्पाले अब हेलम्बुमा पर्यटन अझै फस्टाउने विश्वास व्यक्त गरे ।
उनले मेलम्ची खानेपानी मुहान तथा बाढी प्रभावित क्षेत्रमा अध्ययनका, अनुसन्धान केन्द्रको रुपमा विकसित गरी पर्यटक बढाउने बताए । पर्यटक विस्तारै बढ्न थालेपछि मेलम्ची र आसपासका व्यवसायीमा खुशीको सञ्चार भएको स्थानीय होटल व्यवसायीहरू बताउँछन् ।
