नेपाल हवाई खेलकुद संस्था (ना)को अध्यक्षमा अनिल केसी निर्वाचित भएका छन् । शुक्रबार भएको मतदानमा केसीले १५६ मत प्राप्त गरी विजयी भए । अध्यक्षका प्रत्यासी तथा प्रतिद्वन्द्वी सानोबाबु सुनुवारले ११५ मत प्राप्त गरे ।
नाका निर्वतमान अध्यक्ष सुनिलबहादुर भट्टराईले कुल ३५६ जना मतदातामध्ये २८९ मत खसेको जानकारी दिए । उनका अनुसार १८ मत बदर भएको थियो ।
भट्टराईले अध्यक्ष बाहेकका पदमा सर्वसम्मत् भएको बताए । उनका अनुसार उपाध्यक्षहरुमा विजय गौतम (प्राविधिक), खेमराज आचार्य र माधव तिवारी चयन भए ।
महासचिवमा बलराम आचार्य, सचिवमा रोशन गौतम, कोषाध्यक्षमा शर्मिला शर्मा, सहकोषाध्यक्षमा रेशमबहादुर थापा सर्वसम्मत् चयन भएका छन् । साथै सदस्यहरुमा सचिन बमजन, कृसु पौडेल, रविन अधिकारी, लक्ष्मण कुँवर, गणेश गैरे र रामचन्द्र सुवेदी निर्वाचित भएका छन् ।
निर्वाचनपछि प्रतिक्रिया दिँदै अध्यक्षका प्रत्यासी सुनुवारले लामो रस्साकस्सीपछि निर्वाचनमार्फत संस्थाले नयाँ कार्यसमिति पाएको बताए । उनले नयाँ कार्यसमिति चयन लोकतान्त्रिक पद्धतिमार्फत भएकाले आफूलाई खुसी लागेको बताए ।
