आज फागु पूर्णिमा । धुलिखेल जिपलाइनमा पनि रङहरूको यो पर्वको माहोल बिहानै देखि देखिएको छ ।
होली मनाउने क्रममा धुलिखेल पुगेका युवा युवती रङ खेल्दै जिपलाइनमा रमाएका छन् । फागु पूर्णिमाको अवसरमा कुनैपनी जिपलाइन खेल्दा २० प्रतिसत छुट समेत रहेको छ ।
शरीरमा हार्नेस बाँधेर क्याराभिनाको मद्दतले लठ्ठा (फलामे डोरी) माथि घिर्नीमा झुण्डिदै एक ठाउँबाट हावामा कावा खाँदै अर्को ठाउँसम्म पुग्ने शाहसिक र रोमान्चक खेल हो जिपलाइन ।
क्लासिक जिपलाइन, उडेझैँ खेल्न मिल्ने सुपरम्यान जिपलाइन र टेण्डम (दुई जना सँगै खेल्न मिल्ने) जिपलाइन वल्र्ड वाइड एडभेन्चर प्रालिले धुलिखेलमा सन्चलनमा ल्याएको ४ वर्ष पूरा भएको छ । सुपरम्यान र टेण्डम जिपलाइन नेपालमै पहिलोपटक धुलिखेलमा सुरू गरिएको हो ।
धुलिखेल नगरपालिकाको थाक्ले देखि ११ सय मिटरको जिपलाइनले पाँचखालको खावालाई जोडेको छ । दिनमा सय जनाले सेवा लिन सक्ने जिपलाइन असौसत ७५ किमि प्रतिघन्टाको गतिमा हुत्तिन्छ ।
करिब ३०० मिटर भर्टिकल ड्रपमा उडिरहँदा नजिकका खेतबारी तथा जङ्गलको हरियालीसँगै लाङटाङ, दोर्जे लाक्पा, फुर्बीच्याचु लगायतका हिमालको समेत दृश्यावलोकन गर्न सकिन्छ ।
सिन्धुपाल्चोकका केदार थापा र काठमाडौंका भुपेश श्रेष्ठले करिब ७ करोडको लगानीमा जिपलाइनसँगै रेस्टुरेन्ट, रिसोर्ट र चिल्ड्रेन एड्भेन्चर पार्क निर्माण गरेका छ्न् ।
धुलिखेल जिपलाइनको शुल्क:
क्लासिक (साधारण) जिपलाइन: २५ सय रुपैयाँ
सुपरम्यान जिपलाइन: पैंतीस सय रुपैयाँ
टेन्डम (जोडी) जिपलाइन: ४५ सय रुपैयाँ
