हट एयर बलुन साहसिक पर्यटकीय खेल हो । पछिल्लो समय साहसिक पर्यटनका पारखीहरूको रोजाइमा यो खेल परेको बेलुन नेपालका अध्यक्ष विक्रम बादेले जानकारी दिए ।
करिब ६ हजार फिट माथीसम्म हट एयर बेलुनमा उड्दा माछापुच्छ्रे, अन्नपूर्ण लगायतका हिमालहरू, पूर्ण आकारको फेवाताल, पुम्दिकोट महादेव, सराङ्कोट मान्द्रेढुङ्गाबाट उड्ने प्याराग्लाइडिङ तथा पोखरा उपत्यका आसपासको सुन्दर दृश्यावलोकन गर्न सकिनेछ ।
विगतमा एक मात्रै बेलुन उडाइरहेको यस कम्पनीले अब भने २ वटा बेलुन उडाउनेछ । अमेरिकनीर भियतनामी गरि दुई जना पाइलटले बलुन उडाउनेछन् ।
पोखराको पामेबाट हट एयर बलुन उडान हुने बादेले जानकारी दिए । उनका अनुसार बिहान र बेलुका गरि दुई सिफ्टमा बलुन उडाइनेछ । बिहान ५ बजेदेखि ९ बजेसम्म र बेलुका ३ बजेदेखि ६ बजेसम्म उडान हुने बादेले जानकारी दिए । कम्पनीका अनुसार तीन वर्ष उमेर कटेका नागरिकले हट एयर बलुनमा उड्न सक्नेछन् ।
कति लाग्छ शुल्क ?
हट एयर बलुनमा उड्नका लागि नेपाली पर्यटकलाई ९ हजार ५ सय रुपैयाँ शुल्क लाग्नेछ । यस्तै सार्क मुलुकका पर्यटकका लागि १०० डलर र अन्य मुलुककालाई १३० डलर शुल्क कायम छ । उक्त शुल्क तिरेपछी उडान सगै ब्रेकफास्ट, लेकसाइड देखि पामे सम्म्को दुइतर्फि यातायात सुबिधा र प्रमाणपत्र समेत पाइन्छ । नेपाली पर्यटकले रिजर्भ गरि प्राइभेट उडान गर्न चाहे आधा घन्टाको ५५ हजार र एक घन्टाको ८० हजार रुपैयाँ तोकिएको छ ।
हट एयर बलुनमा उड्ने सोच बनाएर जाँदा बिहानपख केही चिसो हुने हुनाले न्यानो कपडा साथमै लिएर जाँदा राम्रो हुन्छ । यसबाहेक हिल जुत्ता वा अन्य जुत्ता भन्दा स्प्रोर्ट्स जुत्ता लगाउँदा उडानका क्रममा सहज हुनेछ ।
