पातलेद्वार गुफा

English language

한국어 (Korean)

lengua española (Spanish)

中文 (Chinese)

हिन्दी भाषा (Hindi)

日本語 (Japanese)

langue française (French)

तनहुँको बन्दिपुर गाउँपालिकाको वडा नम्बर ४ मा पर्छ, पातलेद्वार गुफा । आकर्षक गुफा एवम् धार्मिक महत्वका कारण यस गुफामा पर्यटकको आकर्षण पाइन्छ ।
गुफामा तीन वटा तला सजिलै देखिन्छ । गुफाभित्र सात वटा तला रहेको स्थानीय कृष्ण बहादुर श्रेष्ठ बताउँछन् ।
उनका अनुसार, विगतमा सो गुफामा रहेका गाइका थुनजस्ता आकृतिबाट दूध निस्कने गरेको थियो । त्यो दूध कुनै भक्तजनले पिइदिएपछि त्यहाँबाट दूध नआई पानी आउने गरेको किंवदन्ती छ ।
गुफाबाट भित्र छिरेर अवलोकन गर्दै गुफाको तल असकोटे महादेवको मन्दिरमा निस्कन मिल्ने गरेको किंवदन्ती छ । तर अहिले भने गुफाबाट निस्कनका लागि दोस्रो बाटो देखिँदैन । विगतमा भगवान रामसमेत त्यस गुफामा ध्यानमा बसेको किंवदन्ती छ । त्यतिखेर सीताले उनलाई ध्यानदृष्टिले हेर्दा राम त्यस गुफामा ध्यानमा बसेको देखेपछि उनी पनि त्यहाँ आएको किंवदन्ती रहेको स्थानीय बताउँछन् ।
प्रत्येक राम नवमीमा यस मन्दिरमा मेला लाग्ने गरेको छ । गुफा परिसरमा राममन्दिर समेत निर्माण गरिएको छ । चैत बैशाखमा जाँदा गुफा आसपासको पाखामा ऐसेलु टिपेर खान पाइन्छ ।
गुफाभित्र गाइका थुन, भकारी, हात्तीको सुँढ जस्ता आकृतिहरू देख्न सकिन्छ । गुफा अँध्यारो भएकाले चमेराहरू नै देख्न सकिन्छ । गुफालाई पछिल्लो समय व्यवस्थित गरिदै गएको छ ।
गुफाका विभिन्न तलामा भर्‍याङ र डोरीको सहारा लिएर उक्लन/ओर्लन सकिन्छ ।

के ख्याल गर्ने ?
गुफाभित्र अँध्यारो हुने भएकाले पर्यटकहरूले अवलोकनका लागि जाँदा टर्च लाइट साथमा लिएर जानुपर्छ ।

कसरी पुग्ने ?
पृथ्वी राजमार्गको विमलनगर नजिकै रहेको नयाँ पुलमा झरेर त्यहाँबाट २० मिनेट उकालो हिँडेपछि गुफा पुगिन्छ ।

फोटो ग्यालरी: